حد علمي

حد علمي بالغلا يوم كنت أسوى كثير
يوم كانت ضحكتي طبع وعنادي سما

وحد علمي بالعنا يوم خفاقي ضرير
قبل اهدم العشق وابنيه وارجع واهدمه

وحد علمي بالبكا يوم لي قلب وضمير
قبل اشوف المسلم يموت بإيد المسلمه

ايه عدت من يدي بس ماعدت بخير
ليلةٍ عيت تجيني وجتني مظلمه

من عرفت احساسها كن في قلبي نذير
والنهار المكتئب باين من المقدمه

ليلةٍ حسيتها ما تجور ولا تجير
مثل طفل ماحقرته وعييت احشمه

واصبحت مثل شعره واقصمت ظهر البعير
وابتدى في موتها الجرح من حيث اختمه

صارلي بالعشق ما لا هقيت انه يصير
انظلمت بعشرة انسان ما كنت اظلمه

العشير اللي تبرى من ضلوع العشير
الحلا عزز خطاياه والحظ خدمه

لا تبسم يكسر النور في عيون البصير
وكن شمس المغربيه تبات بمبسمه

معتدل في قامته لا طويل ولا قصير
ممتلي بالزين من معصمه لين معصمه

فيه بألوان الهدب لون غير ولون غير
مثل ما للرمش بالعين قصه مبهمه

كنها لأقسى البيارق على شط وغدير
ومثل لملمة الشتات بشتات اللملمه

في سواد مجدلٍ ما يثور الا يثير
كنها اللي ينهم الريح ثم تنهمه

ما تجمع لين قيد حرير في حرير
مع ظلام علم الليل ما لا يعلمه

ماهقيت ان الهدب صلب وأجفانه تغير
لين سلهم لعنبو جد ذيك السلهمه

ما عتقني لين ساق البشاير للبشير
يوم صد وجاه قلبي بشحمه ولحمه

والله انه حط قلبي تحت رحمة شطير
في إيديه وكل ما راد يقسمه اقسمه

يا عساني معدم رضاه في برد وهجير
وان عدمت مروته ياعساني ما اعدمه

لو هو بس يعدني حسبة اخوه الكبير
لجل يزهمني ليا ضاق وان ضقت ازهمه

ان طلب عيني رضا قلت ماغيره نظير
وان شرب دمي غضب قلت يستاهل فمه

واهنياله يرقد الليل مرقاد الغرير
كن نومه لا بغا يهزم الجفن هزمه

ولا أنا من صفرة عصير الا صفرة عصير
والسهر لا يلزم العين ولا تلزمه

لو صحيح ان الحبيبين يجمعهم مصير
كان نفس اللي حرمني من النوم حرمه

والله ان مروتي ولعت فيني سعير
يوم شفته تل قلبي وداسه بالدما

مارحم زهرة شبابي وانا توي صغير
لين ضيق خاطري ضيق الله نسمه

ايه عدت من يدي بس ماعدت بخير
ليلةٍ عيت تجيني وجتني مظلمه

حد علمي في عناها عذاب وزمهرير
يوم توحي بالأضلاع صوت وهمهمه

وحد علمي بالرجا من نصير اليا نصير
يوم شفت النفس تذبح وهي مستسلمه

وحد علمي بالبكا يوم لي قلب وضمير
قبل اشوف المسلم يموت بإيد المسلمه

وسلامتكم

أختكم :
مهنديه وكلي غرور